Муҳтарам ватандошлар!
Барчамиз учун муқаддас Ватан, аввало, ўз уйимиз, маҳалламиз остонасидан бошланади. Ҳаммамизнинг ҳаётимиздаги яхши ва беғубор дамлар, ташвишли кунлар, тақдиримиз ва келажагимиз ўзини ўзи бошқаришнинг ноёб тизими бўлган ана шу идора билан бевосита боғлиқ. Муҳтарам Президентимиз Шавкат Мирзиёев таъкидлаб айтганларидек, маҳалла тинч бўлса – юртимиз тинч, маҳалла обод бўлса – бутун мамлакатимиз обод ва фаровон бўлади.

Кейинги йилларда миллий ўзлигимиз тимсоли, бетакрор қадрият ва анъаналаримиз бешиги бўлган ана шу институтнинг жамият ҳаётидаги ўрни ва нуфузини, ваколатларини ошириш, моддий-техник базаси ва кадрлар салоҳиятини мустаҳкамлаш бўйича улкан ишлар амалга оширилди. Умумхалқ референдуми асосида қабул қилинган янги таҳрирдаги Конституциямизда маҳалла бошқарувига оид муҳим янги моддалар киритилди.

Бу ҳақда гапирганда, охирги 7 йилда тизимни такомиллаштиришга қаратилган 100 га яқин норматив-ҳуқуқий ҳужжат қабул қилинганини, барча соҳа ва йўналишлар бўйича “маҳаллабай” ишлаш усули кенг жорий этилиб, маҳалла раиси, ҳоким ёрдамчиси, ёшлар етакчиси, хотин-қизлар фаоли, профилактика инспектори, ижтимоий ходим ва солиқ инспекторидан иборат таъсирчан тузилма фаолияти йўлга қўйилгани ижобий самара бераётганини алоҳида таъкидлаш ўринлидир.

Давлатимиз раҳбари қайд этганидек, бугунги кунда ҳамма иш маҳаллада, халқимиз билан биргаликда ташкил қилинмоқда. Бу тизим босқичма-босқич ривожлантирилмоқда, унга қўшимча куч, имкониятлар бериляпти. Бу – албатта ҳам ваколат, ҳам масъулият дегани. Маҳаллалар – давлатимизнинг энг катта замини.

Ҳозирги вақтда “Маҳалла еттилиги” томонидан бандликни таъминлаш, ижтимоий ҳимояга муҳтож оилалар, нуроний отахон ва онахонларимиз, хотин-қизлар ва ёшларга манзилли ёрдам кўрсатиш, фуқароларни замонавий касб-ҳунар ва тадбиркорликка ўқитиш, камбағалликни қисқартириш ҳамда маънавий-маърифий тадбирлар ўтказиш каби бир-биридан муҳим ишлар олиб борилмоқда.

Хонадонларнинг иқтисодий-ижтимоий аҳволи тўлиқ хатловдан ўтказилиб, ҳар бир маҳалланинг ўсиш нуқталари аниқлаб олинди. “Хонадонбай”, “оилабай” ишлаш тизими, “Обод хонадон – обод кўча – обод маҳалла” мезонлари жорий этилди.

Ана шундай изчил саъй-ҳаракатлар туфайли маҳалла идорасининг жамият ҳаётидаги ўрни ва нуфузи янада мустаҳкамланиб, у аҳолига ижтимоий кўмак кўрсатишнинг адолатли ва таъсирчан институтига, самарали жамоатчилик назоратини ўрнатадиган, одамларга энг яқин халқчил тузилмага, чинакам халқ виждонига айланиб бормоқда.

Ҳурматли маҳалла фаоллари!

Бугунги кунда бутун мамлакатимиз каби маҳаллаларимиз тараққиётида ҳам янги давр бошланмоқда. “Ўзбекистон – 2030” стратегиясида белгиланган юксак мақсад ва вазифалар асосида маҳалла тизимида ҳам кенг кўламли ишларни амалга ошириб, фаолиятимизни янги сифат босқичига кўтаришимиз лозим. Ҳеч шубҳасиз, Президентимизнинг яқинда қабул қилинган фармон ва қарорига мувофиқ мамлакатимизда, Қорақалпоғистон Республикаси, вилоятлар, Тошкент шаҳри, туман ва шаҳарларда маҳаллани қўллаб-қувватлаш кенгашлари, Ўзбекистон маҳаллалари уюшмаси ва унинг ҳудудий тузилмалари ташкил этилиб иш бошлагани бу борада янги имкониятларни очади.

Маҳалланинг аҳолига ижтимоий кўмак бериш борасидаги ваколати кучайтирилди. Эндиликда “Темир дафтар”, “Ёшлар дафтари” ва “Аёллар дафтари” орқали ижтимоий ёрдам кўрсатиш ва субсидиялар ажратиш “маҳалла еттилиги”нинг биргаликдаги қарори асосида амалга оширилади.

“Маҳалла еттилиги” фаолиятининг асосий самарадорлик кўрсаткичлари (KPI) бўйича алоҳида баҳолаш тартиби жорий этилмоқда ва маҳалла раислари энди 20 фоиз балл бериш ҳуқуқига эга. Барча туман ва шаҳарларда “Маҳалла бюджети” тизими жорий этилди.
“Фуқароларнинг ўзини ўзи бошқариш органлари тўғрисида”ги қонуннинг янги таҳрирдаги лойиҳаси ишлаб чиқилиб, унда маҳаллаларни ташкил этиш, “маҳалла еттилиги”нинг масъулияти ва жавобгарлиги бўйича аниқ мезонлар белгиланади. “Еттилик” аъзоларини тайинлашда маҳаллада яшайдиган номзодларга устунлик берилади. Маҳалла раисининг сўровига жавоб бермаслик ёки унинг тақдимномасида қўйилган масалани кўриб чиқмаслик учун жавобгарлик белгиланади.

“Фуқаролар йиғини раиси сайлови тўғрисида”ги қонуннинг янги таҳрирдаги лойиҳаси ишлаб чиқилиб, унда маҳалла раиси сайловини аҳоли томонидан умумий, тенг, тўғридан-тўғри сайлов ҳуқуқи асосида яширин овоз бериш орқали ўтказиш, маҳалла раисининг маълумоти ва малакаси бўйича қўйиладиган талаблар, маҳалла раисининг ваколат муддатини 3 йилдан 5 йилга узайтириш каби янгиликлар киритиш кўзда тутилмоқда.

Азиз дўстлар!

Маҳаллаларга кўрсатилаётган юксак эътибор ва ғамхўрлик ўз навбатида зиммамизга катта масъулият ва жавобгарлик юклашини албатта барчамиз яхши тасаввур қиламиз. Айниқса, Президентимиз раислигида 2023 йил 22 декабрь куни Республика Маънавият ва маърифат кенгаши, 2024 йил 12 январда Хавфсизлик кенгашининг кенгайтирилган йиғилишларида муҳокама қилинган долзарб масалалар ва белгилаб олинган муҳим вазифалар ўзини маҳалла ҳаётига, эл-юртимиз тақдири ва келажагига дахлдор деб билган ҳеч қайси инсонни бефарқ қолдирмайди. Чунки инсон қадри, меҳр-оқибат ва ҳамжиҳатлик, миллатлараро дўстлик ва тотувлик, маънавият ва маърифат, маданият ва санъат, спорт ва илм-фан ривожи, ёшларни ҳарбий-ватанпарварлик руҳида тарбиялаш, аввало, маҳалладан бошланади.

Глобаллашув жараёнлари ҳамда одамлар, айниқса, ёш авлоднинг қалби ва онги учун кураш кучайиб бораётган ҳозирги ўта мураккаб шароитда маҳаллаларда ҳарбий-ватанпарварлик руҳидаги тарбиянинг ўрни ва аҳамияти тобора ортиб бормоқда. Бугунги кунда ҳар биримиз амалда Ватан ҳимоячиси бўлишимиз, ёшларимизни ҳам шу руҳда камол топтиришимиз зарур. Навқирон авлод вакилларининг ислоҳотлар жараёнидаги иштирокини ошириш, улар ўз интеллектуал ва ижодий салоҳиятини рўёбга чиқариши учун биринчи навбатда маҳаллаларда қулай муҳит ва шароитлар яратиш ўта муҳим вазифамиздир.

Бизнинг бу борадаги иштирокимиз, аввало, бир-биримизга, қўни-қўшниларга, кўчамизда, маҳалламизда униб-ўсиб келаётган болалар тарбиясига бефарқ бўлмасдан, жон куйдиришда, том маънода “ҳар бир болага ҳам ота, ҳам она, ҳам устоз, ҳам тарбиячи” бўлишимизда намоён бўлади. Айниқса, миллий маънавиятимизга қарши қаратилган бузғунчи ҳаракатларга қарши курашиш ва маҳаллада ахлоқий-тарбиявий муҳит барқарорлигини таъминлашда муҳтарам отахон ва онахонларимиз, фаол кўча ва уй бошлиқлари, имом-хатиб ва отинойилар, зиёлиларимиз ва тадбиркорларимизнинг фидойилиги катта аҳамиятга эга.

Ўзингиз айтинг, бугун баъзи гуруҳлар орасида кузатилаётган диний қарашларни Конституция ва қонунларимизга қарши ва улардан устун қўйиш ҳолатларига, диний эътиқод ниқоби остида ёшларни маърифатга эмас, жаҳолатга ундаётган кишиларга, кўп хотинлик, аёл киши ишламасдан уйда ўтириши, ўқимаслиги керак, деган сохта “даъват”ларга қарши биз курашмасак ким курашади?

Маънавий таҳдидларга қарши курашни, аввало, оиламиздан, маҳалламиздан бошлашимиз зарур. Бу борада маҳалла фаоллари ва жамоатчилик тузилмалари фаол бўлмоғи лозим. Ўзимиз, фарзанд ва набираларимиз ҳаёти ҳамда келажагига дахлдор бундай масалаларда энди “ухлаб ўтириш”, лоқайд бўлишга асло ҳаққимиз йўқ.
Айниқса, ёшлар билан кўпроқ гаплашиш, уларнинг қалбига қулоқ солиш, дардини билиш, муаммоларига ечим топиш, жумладан, уюшмаган ёшлар билан ишлаш, ҳарбий хизматга муносиб мард ва ботир йигитларни тарбиялашга эътибор қаратиш маҳалла фаолиятининг асосий йўналиши бўлиши шарт. Бу борада тегишли давлат ва нодавлат ташкилотлар билан ҳамкорликни кучайтиришимиз лозим. Президентимиз белгилаб берган тўғри йўлда энди ташаббус кўрсатиш, турли иллатларга қарши курашишдан уялиб, тортиниб ўтириш бизга ярашмайди. Дадил бўлайлик, сўзимиз ва ишимиз ҳам кескир бўлсин! Агар барчамиз бирлашиб, хавф-хатар ва муаммоларни енгмасак, улар бизни енгади. Биз бирлашмасак, бузғунчи кучлар бизга қарши бирлашади. Буни ҳеч қачон унутмаслигимиз лозим.

Маҳалла ва оилаларда ижтимоий-маънавий муҳитни ўрганиш ҳамда аниқланган ижтимоий муаммолар мутасадди ташкилотлар томонидан бартараф этилиши устидан жамоатчилик назоратини кучайтирайлик! Ёшларимизнинг “онлайн қимор”, “тармоқдаги ўғрилик”, фирибгарлик каби иллатларга берилиб, жаҳолат қурбонига айланишига йўл қўймайлик!

Тўй-ҳашамлардаги дабдабабозлик, исрофгарчиликка чек қўяйлик!

Агар сидқидилдан ҳаракат қилсак, маҳалланинг қурби етмайдиган ишнинг ўзи йўқ. Маҳалламиздаги жамоатчилик тузилмалари, “Маҳалла назорати” ва “Кексалар маслаҳати” гуруҳларига, “Оқила аёллар” ҳаракатига энг фаол ва жонкуяр фаолларни жалб этиб, уларни эзгу мақсад йўлида сафарбар этсак, ҳар қандай муаммони албатта ҳал қиламиз.

Қадрли маҳалла фаоллари!

Бугун қуйидаги устувор масалаларга алоҳида эътибор беришимиз зарур.

Авваламбор, “Боланинг бегонаси бўлмайди!”, “Бир болага етти маҳалла ҳам ота, ҳам она”, “Менинг маҳаллам, менинг кўчам тинч ва тоза, жиноятчиликдан холи маҳалла, кўча!”, “Менинг маҳалламда жиноят содир бўлмаслиги керак!”, “Мен маҳалламга бефарқ эмасман!” каби эзгу шиор ва даъватларни амалий ҳаракатга айлантиришимиз керак.

Иккинчидан, маҳаллаларда ҳеч ким меҳр ва эътибордан четда қолмаслиги зарур – етим-есирлар, ногиронлиги бўлган шахслар, боқувчисини йўқотган оилалар, якка-ёлғиз қарияларни қўллаб-қувватлаш фаолиятимизнинг муҳим йўналиши бўлиши шарт.

Учинчидан, уйма-уй юриш, ҳар бир оиланинг турмуш тарзидан хабардор бўлиш, оилалар фаровонлигини ошириш, аҳоли, айниқса, ёшлар ва хотин-қизлар бандлигини таъминлаш, тадбиркорликни ривожлантириш, аҳолида томорқа маданиятини юксалтиришга эътиборни кучайтиришимиз лозим.

Тўртинчидан, нотинч, ажралиш ёқасида турган оилалар, жиноят содир этишга мойил ёки аъзолари ўз жонига суиқасд қилган, узоқ муддатга хорижга ишлаш учун кетган, жазони ижро этиш муассасаларидаги фуқароларнинг оилалари билан мунтазам ишласак, яхши натижага эришамиз.

Бешинчидан, оила ва маҳаллаларда ижтимоий-маънавий муҳитни соғломлаштириш, тўй-ҳашамларни дабдабадан холи, ихчам ва камхарж ўтказишга кўпни кўрган нуронийларимизни кенг жалб этиб, уларнинг бой ҳаётий тажрибасидан самарали фойдаланишимиз зарур.

Олтинчидан, маҳаллада жамоатчилик назорати таъсирчанлигини оширишимиз зарур. Қонун ҳужжатлари, ҳудудларни комплекс ривожлантириш дастурлари, фуқаролар йиғинларининг қарорлари ижросини назорат қилиш, корхона ҳамда ташкилотлар раҳбарлари ҳисоботларини эшитиш каби йўналишлар бўйича тизимли жамоатчилик назоратини самарали ташкил этишимиз керак.

Мухтасар қилиб айтганда, Президентимизнинг “Қайси маҳаллада иш тўғри ташкил этилиб, фуқаролар билан яқин ҳамкорлик ўрнатилса, ўша ерда ҳамжиҳатлик, меҳр-оқибат муҳити ҳукм суради, нохуш ҳолатларга йўл қўйилмайди”, деган сўзлари фаолиятимизда дастуриламал бўлиши лозим.

Азиз ҳамкасблар!

Ҳеч қачон унутмайлик, ана шу вазифаларни амалга ошириш биз учун нафақат мажбурият, балки муқаддас бурчимиздир.

Янги Ўзбекистонни барпо этиш, мамлакатимизни равнақ топтириш, халқимиз фаровонлигини ошириш, одамларимизни ҳаётдан рози қилиш йўлида муҳтарам Президентимизга таянч ва суянч бўлайлик!

Шу йўлда “Менинг маҳаллам – менинг истиқболим – менинг тақдирим”, деган тамойил ҳаётий шиоримизга айлансин!

Бундай масъулиятли вазифаларни виждонан ва ҳалол бажариб, барчамизга билдирилган юксак ишончни оқлаш учун бор куч ва имкониятларимизни сафарбар этамиз, деб ишонамиз!
Донишманд боболаримиз айтганларидек, “Бу дунёда одамларга эзгулик улашиб яшашдан кўра улуғ ва савоб иш йўқ”. Ана шу ҳикматга амал қилиб яшасак, ишимизда албатта натижа бўлади, халқимиз ва Президентимизнинг ишончини оқлаган бўламиз.

Ана шундай буюк саодат барчамизга ёр бўлсин!

 

 

Muhtaram vatandoshlar!
Barchamiz uchun muqaddas Vatan, avvalo, о‘z uyimiz, mahallamiz ostonasidan boshlanadi. Hammamizning hayotimizdagi yaxshi va beg‘ubor damlar, tashvishli kunlar, taqdirimiz va kelajagimiz о‘zini о‘zi boshqarishning noyob tizimi bо‘lgan ana shu idora bilan bevosita bog‘liq. Muhtaram Prezidentimiz Shavkat Mirziyoyev ta’kidlab aytganlaridek, mahalla tinch bо‘lsa – yurtimiz tinch, mahalla obod bо‘lsa – butun mamlakatimiz obod va farovon bо‘ladi.

Keyingi yillarda milliy о‘zligimiz timsoli, betakror qadriyat va an’analarimiz beshigi bо‘lgan ana shu institutning jamiyat hayotidagi о‘rni va nufuzini, vakolatlarini oshirish, moddiy-texnik bazasi va kadrlar salohiyatini mustahkamlash bо‘yicha ulkan ishlar amalga oshirildi. Umumxalq referendumi asosida qabul qilingan yangi tahrirdagi Konstitusiyamizda mahalla boshqaruviga oid muhim yangi moddalar kiritildi.

Bu haqda gapirganda, oxirgi 7 yilda tizimni takomillashtirishga qaratilgan 100 ga yaqin normativ-huquqiy hujjat qabul qilinganini, barcha soha va yо‘nalishlar bо‘yicha “mahallabay” ishlash usuli keng joriy etilib, mahalla raisi, hokim yordamchisi, yoshlar yetakchisi, xotin-qizlar faoli, profilaktika inspektori, ijtimoiy xodim va soliq inspektoridan iborat ta’sirchan tuzilma faoliyati yо‘lga qо‘yilgani ijobiy samara berayotganini alohida ta’kidlash о‘rinlidir.

Davlatimiz rahbari qayd etganidek, bugungi kunda hamma ish mahallada, xalqimiz bilan birgalikda tashkil qilinmoqda. Bu tizim bosqichma-bosqich rivojlantirilmoqda, unga qо‘shimcha kuch, imkoniyatlar berilyapti. Bu – albatta ham vakolat, ham mas’uliyat degani. Mahallalar – davlatimizning eng katta zamini.

Hozirgi vaqtda “Mahalla yettiligi” tomonidan bandlikni ta’minlash, ijtimoiy himoyaga muhtoj oilalar, nuroniy otaxon va onaxonlarimiz, xotin-qizlar va yoshlarga manzilli yordam kо‘rsatish, fuqarolarni zamonaviy kasb-hunar va tadbirkorlikka о‘qitish, kambag‘allikni qisqartirish hamda ma’naviy-ma’rifiy tadbirlar о‘tkazish kabi bir-biridan muhim ishlar olib borilmoqda.

Xonadonlarning iqtisodiy-ijtimoiy ahvoli tо‘liq xatlovdan о‘tkazilib, har bir mahallaning о‘sish nuqtalari aniqlab olindi. “Xonadonbay”, “oilabay” ishlash tizimi, “Obod xonadon – obod kо‘cha – obod mahalla” mezonlari joriy etildi.

Ana shunday izchil say-harakatlar tufayli mahalla idorasining jamiyat hayotidagi о‘rni va nufuzi yanada mustahkamlanib, u aholiga ijtimoiy kо‘mak kо‘rsatishning adolatli va ta’sirchan institutiga, samarali jamoatchilik nazoratini о‘rnatadigan, odamlarga eng yaqin xalqchil tuzilmaga, chinakam xalq vijdoniga aylanib bormoqda.

Hurmatli mahalla faollari!

Bugungi kunda butun mamlakatimiz kabi mahallalarimiz taraqqiyotida ham yangi davr boshlanmoqda. “О‘zbekiston – 2030” strategiyasida belgilangan yuksak maqsad va vazifalar asosida mahalla tizimida ham keng kо‘lamli ishlarni amalga oshirib, faoliyatimizni yangi sifat bosqichiga kо‘tarishimiz lozim. Hech shubhasiz, Prezidentimizning yaqinda qabul qilingan farmon va qaroriga muvofiq mamlakatimizda, Qoraqalpog‘iston Respublikasi, viloyatlar, Toshkent shahri, tuman va shaharlarda mahallani qо‘llab-quvvatlash kengashlari, О‘zbekiston mahallalari uyushmasi va uning hududiy tuzilmalari tashkil etilib ish boshlagani bu borada yangi imkoniyatlarni ochadi.

Mahallaning aholiga ijtimoiy kо‘mak berish borasidagi vakolati kuchaytirildi. Endilikda “Temir daftar”, “Yoshlar daftari” va “Ayollar daftari” orqali ijtimoiy yordam kо‘rsatish va subsidiyalar ajratish “mahalla yettiligi”ning birgalikdagi qarori asosida amalga oshiriladi.

“Mahalla yettiligi” faoliyatining asosiy samaradorlik kо‘rsatkichlari (KPI) bо‘yicha alohida baholash tartibi joriy etilmoqda va mahalla raislari endi 20 foiz ball berish huquqiga ega. Barcha tuman va shaharlarda “Mahalla byudjeti” tizimi joriy etildi.
“Fuqarolarning о‘zini о‘zi boshqarish organlari tо‘g‘risida”gi qonunning yangi tahrirdagi loyihasi ishlab chiqilib, unda mahallalarni tashkil etish, “mahalla yettiligi”ning mas’uliyati va javobgarligi bо‘yicha aniq mezonlar belgilanadi. “Yettilik” a’zolarini tayinlashda mahallada yashaydigan nomzodlarga ustunlik beriladi. Mahalla raisining sо‘roviga javob bermaslik yoki uning taqdimnomasida qо‘yilgan masalani kо‘rib chiqmaslik uchun javobgarlik belgilanadi.

“Fuqarolar yig‘ini raisi saylovi tо‘g‘risida”gi qonunning yangi tahrirdagi loyihasi ishlab chiqilib, unda mahalla raisi saylovini aholi tomonidan umumiy, teng, tо‘g‘ridan-tо‘g‘ri saylov huquqi asosida yashirin ovoz berish orqali о‘tkazish, mahalla raisining ma’lumoti va malakasi bо‘yicha qо‘yiladigan talablar, mahalla raisining vakolat muddatini 3 yildan 5 yilga uzaytirish kabi yangiliklar kiritish kо‘zda tutilmoqda.

Aziz dо‘stlar!

Mahallalarga kо‘rsatilayotgan yuksak e’tibor va g‘amxо‘rlik о‘z navbatida zimmamizga katta mas’uliyat va javobgarlik yuklashini albatta barchamiz yaxshi tasavvur qilamiz. Ayniqsa, Prezidentimiz raisligida 2023 yil 22 dekabr kuni Respublika Ma’naviyat va ma’rifat kengashi, 2024 yil 12 yanvarda Xavfsizlik kengashining kengaytirilgan yig‘ilishlarida muhokama qilingan dolzarb masalalar va belgilab olingan muhim vazifalar о‘zini mahalla hayotiga, el-yurtimiz taqdiri va kelajagiga daxldor deb bilgan hech qaysi insonni befarq qoldirmaydi. Chunki inson qadri, mehr-oqibat va hamjihatlik, millatlararo dо‘stlik va totuvlik, ma’naviyat va ma’rifat, madaniyat va san’at, sport va ilm-fan rivoji, yoshlarni harbiy-vatanparvarlik ruhida tarbiyalash, avvalo, mahalladan boshlanadi.

Globallashuv jarayonlari hamda odamlar, ayniqsa, yosh avlodning qalbi va ongi uchun kurash kuchayib borayotgan hozirgi о‘ta murakkab sharoitda mahallalarda harbiy-vatanparvarlik ruhidagi tarbiyaning о‘rni va ahamiyati tobora ortib bormoqda. Bugungi kunda har birimiz amalda Vatan himoyachisi bо‘lishimiz, yoshlarimizni ham shu ruhda kamol toptirishimiz zarur. Navqiron avlod vakillarining islohotlar jarayonidagi ishtirokini oshirish, ular о‘z intellektual va ijodiy salohiyatini rо‘yobga chiqarishi uchun birinchi navbatda mahallalarda qulay muhit va sharoitlar yaratish о‘ta muhim vazifamizdir.

Bizning bu boradagi ishtirokimiz, avvalo, bir-birimizga, qо‘ni-qо‘shnilarga, kо‘chamizda, mahallamizda unib-о‘sib kelayotgan bolalar tarbiyasiga befarq bо‘lmasdan, jon kuydirishda, tom ma’noda “har bir bolaga ham ota, ham ona, ham ustoz, ham tarbiyachi” bо‘lishimizda namoyon bо‘ladi. Ayniqsa, milliy ma’naviyatimizga qarshi qaratilgan buzg‘unchi harakatlarga qarshi kurashish va mahallada axloqiy-tarbiyaviy muhit barqarorligini ta’minlashda muhtaram otaxon va onaxonlarimiz, faol kо‘cha va uy boshliqlari, imom-xatib va otinoyilar, ziyolilarimiz va tadbirkorlarimizning fidoyiligi katta ahamiyatga ega.

О‘zingiz ayting, bugun ba’zi guruhlar orasida kuzatilayotgan diniy qarashlarni Konstitusiya va qonunlarimizga qarshi va ulardan ustun qо‘yish holatlariga, diniy e’tiqod niqobi ostida yoshlarni ma’rifatga emas, jaholatga undayotgan kishilarga, kо‘p xotinlik, ayol kishi ishlamasdan uyda о‘tirishi, о‘qimasligi kerak, degan soxta “da’vat”larga qarshi biz kurashmasak kim kurashadi?

Ma’naviy tahdidlarga qarshi kurashni, avvalo, oilamizdan, mahallamizdan boshlashimiz zarur. Bu borada mahalla faollari va jamoatchilik tuzilmalari faol bо‘lmog‘i lozim. О‘zimiz, farzand va nabiralarimiz hayoti hamda kelajagiga daxldor bunday masalalarda endi “uxlab о‘tirish”, loqayd bо‘lishga aslo haqqimiz yо‘q.
Ayniqsa, yoshlar bilan kо‘proq gaplashish, ularning qalbiga quloq solish, dardini bilish, muammolariga yechim topish, jumladan, uyushmagan yoshlar bilan ishlash, harbiy xizmatga munosib mard va botir yigitlarni tarbiyalashga e’tibor qaratish mahalla faoliyatining asosiy yо‘nalishi bо‘lishi shart. Bu borada tegishli davlat va nodavlat tashkilotlar bilan hamkorlikni kuchaytirishimiz lozim. Prezidentimiz belgilab bergan tо‘g‘ri yо‘lda endi tashabbus kо‘rsatish, turli illatlarga qarshi kurashishdan uyalib, tortinib о‘tirish bizga yarashmaydi. Dadil bо‘laylik, sо‘zimiz va ishimiz ham keskir bо‘lsin! Agar barchamiz birlashib, xavf-xatar va muammolarni yengmasak, ular bizni yengadi. Biz birlashmasak, buzg‘unchi kuchlar bizga qarshi birlashadi. Buni hech qachon unutmasligimiz lozim.

Mahalla va oilalarda ijtimoiy-ma’naviy muhitni о‘rganish hamda aniqlangan ijtimoiy muammolar mutasaddi tashkilotlar tomonidan bartaraf etilishi ustidan jamoatchilik nazoratini kuchaytiraylik! Yoshlarimizning “onlayn qimor”, “tarmoqdagi о‘g‘rilik”, firibgarlik kabi illatlarga berilib, jaholat qurboniga aylanishiga yо‘l qо‘ymaylik!

Tо‘y-hashamlardagi dabdababozlik, isrofgarchilikka chek qо‘yaylik!

Agar sidqidildan harakat qilsak, mahallaning qurbi yetmaydigan ishning о‘zi yо‘q. Mahallamizdagi jamoatchilik tuzilmalari, “Mahalla nazorati” va “Keksalar maslahati” guruhlariga, “Oqila ayollar” harakatiga eng faol va jonkuyar faollarni jalb etib, ularni ezgu maqsad yо‘lida safarbar etsak, har qanday muammoni albatta hal qilamiz.

Qadrli mahalla faollari!

Bugun quyidagi ustuvor masalalarga alohida e’tibor berishimiz zarur.

Avvalambor, “Bolaning begonasi bо‘lmaydi!”, “Bir bolaga yetti mahalla ham ota, ham ona”, “Mening mahallam, mening kо‘cham tinch va toza, jinoyatchilikdan xoli mahalla, kо‘cha!”, “Mening mahallamda jinoyat sodir bо‘lmasligi kerak!”, “Men mahallamga befarq emasman!” kabi ezgu shior va da’vatlarni amaliy harakatga aylantirishimiz kerak.

Ikkinchidan, mahallalarda hech kim mehr va e’tibordan chetda qolmasligi zarur – yetim-yesirlar, nogironligi bо‘lgan shaxslar, boquvchisini yо‘qotgan oilalar, yakka-yolg‘iz qariyalarni qо‘llab-quvvatlash faoliyatimizning muhim yо‘nalishi bо‘lishi shart.

Uchinchidan, uyma-uy yurish, har bir oilaning turmush tarzidan xabardor bо‘lish, oilalar farovonligini oshirish, aholi, ayniqsa, yoshlar va xotin-qizlar bandligini ta’minlash, tadbirkorlikni rivojlantirish, aholida tomorqa madaniyatini yuksaltirishga e’tiborni kuchaytirishimiz lozim.

Tо‘rtinchidan, notinch, ajralish yoqasida turgan oilalar, jinoyat sodir etishga moyil yoki a’zolari о‘z joniga suiqasd qilgan, uzoq muddatga xorijga ishlash uchun ketgan, jazoni ijro etish muassasalaridagi fuqarolarning oilalari bilan muntazam ishlasak, yaxshi natijaga erishamiz.

Beshinchidan, oila va mahallalarda ijtimoiy-ma’naviy muhitni sog‘lomlashtirish, tо‘y-hashamlarni dabdabadan xoli, ixcham va kamxarj о‘tkazishga kо‘pni kо‘rgan nuroniylarimizni keng jalb etib, ularning boy hayotiy tajribasidan samarali foydalanishimiz zarur.

Oltinchidan, mahallada jamoatchilik nazorati ta’sirchanligini oshirishimiz zarur. Qonun hujjatlari, hududlarni kompleks rivojlantirish dasturlari, fuqarolar yig‘inlarining qarorlari ijrosini nazorat qilish, korxona hamda tashkilotlar rahbarlari hisobotlarini eshitish kabi yо‘nalishlar bо‘yicha tizimli jamoatchilik nazoratini samarali tashkil etishimiz kerak.

Muxtasar qilib aytganda, Prezidentimizning “Qaysi mahallada ish tо‘g‘ri tashkil etilib, fuqarolar bilan yaqin hamkorlik о‘rnatilsa, о‘sha yerda hamjihatlik, mehr-oqibat muhiti hukm suradi, noxush holatlarga yо‘l qо‘yilmaydi”, degan sо‘zlari faoliyatimizda dasturilamal bо‘lishi lozim.

Aziz hamkasblar!

Hech qachon unutmaylik, ana shu vazifalarni amalga oshirish biz uchun nafaqat majburiyat, balki muqaddas burchimizdir.

Yangi О‘zbekistonni barpo etish, mamlakatimizni ravnaq toptirish, xalqimiz farovonligini oshirish, odamlarimizni hayotdan rozi qilish yо‘lida muhtaram Prezidentimizga tayanch va suyanch bо‘laylik!

Shu yо‘lda “Mening mahallam – mening istiqbolim – mening taqdirim”, degan tamoyil hayotiy shiorimizga aylansin!

Bunday mas’uliyatli vazifalarni vijdonan va halol bajarib, barchamizga bildirilgan yuksak ishonchni oqlash uchun bor kuch va imkoniyatlarimizni safarbar etamiz, deb ishonamiz!
Donishmand bobolarimiz aytganlaridek, “Bu dunyoda odamlarga ezgulik ulashib yashashdan kо‘ra ulug‘ va savob ish yо‘q”. Ana shu hikmatga amal qilib yashasak, ishimizda albatta natija bо‘ladi, xalqimiz va Prezidentimizning ishonchini oqlagan bо‘lamiz.

Ana shunday buyuk saodat barchamizga yor bо‘lsin!